I lindur në Shipkovicë, ne pranverë (më 25 mars), të vitit 1925, (ka vdekur me 11/09/2006  Bilall Osmani ka qenë, një nga pleqtë më të dashur e më të nderuar të këtij katundi. Në bazë të një dorëshkrimi qe na arriti këto ditë nga një pjestar i familjes së Tij, kuptojmë se qysh në fëmijëri është marrë me bujqësi, ndërsa që nga viti 1944, merr pjesë në luftën e dytë botërore. Nuk kishte veçse njëzet vjet kur kuptoi djallëzinë e komunizmit pansllavist. Në këtë moshë të njomë, ai i bashkangjitet Brigadës së Shtatë, në krye me Qazim Lushin. Në oborrin e Qendrës së Mesmë të sotme Shkollore "Mosha Pijade", në Tetovë, ata presin në atë kohë: Qazim Lushin, Nafi Sulejmanin dhe Memet Bushin, për t'iu bashkangjitur Brigadës së lartëpërmendur, për në drejtim të Preshevës.                                                                                                                                       Atje presin shtatë ditë, kur erdhën do oficerë maqedonë, që u mbajtën një fjalim lidhur me firmosjen dhe shkuarjen në Fushën e Sremit. Megjithatë, shqiptarët e zgjuar e panë se është puna për një dinakëri të eprorëve ushtarakë maqedonas, që insistonin t'i largojnë ushtarët shqiptarë, gjoja se për t'i dëbuar fashistët në veri të vendit, e në anën tjetër t'u vërsulen vendbanimeve e familjeve të tyre, për plaçkitje e çnderime. Bilall Osmani me shokë, nuk ranë pre e kësaj tradhëtie.                                                             Së bashku me dyzet shqiptarë të tjerë, të armatosur, ata u nisën për në Tetovë. Nga ndjekja e komunistëve, Bilalli e lëshoi shtëpinë. Poashtu pat vepruar edhe një tribun tjetër i patriotizmit shqiptar, edhe ky nga Shipkovica: Lazim Rexhepi, sëbashku me Hasim Veselin, Alishahun e Gajres e do bashkëfshatarë të tjerë të Bilallit. Ishte një dimër i ashpër atë kohë. Ata ndenjën në mal shtatë ditë. Pas shtatë ditëve, siç thekson autori ikëtij dorëshkrimi "i mashtruan tradhtarët për të zbritur nga mali e për te ardhur në shtëpi". Dhe ç'ngjau pastaj? Hyjnë komunistët në Shipkovicë dhe e arrestojnë Bilall Osmanin. E maltretojnë deri në alivanmosje; e sulmojnë brutalisht me kundak pushke, pastaj e marrin në burg ku e mbajnë 15 ditë, pa ngrënë e pa pirë. Pas dy javësh, e marrin dhe e fusin në Brigadën e Tretë të komunistëve maqedonë, ku detyrohet ta kryejë ushtrinë dy vjet, pastaj e lëshojnë në liri.